AI Boom: ప్రపంచవ్యాప్తంగా ఆర్టిఫిషియల్ ఇంటెలిజెన్స్ వినియోగం వేగంగా పెరుగుతుండటంతో భారీ స్థాయిలో డేటా సెంటర్లు నిర్మిస్తున్నారు. వీటి నిర్మాణానికి అవసరమైన కాపర్ వైర్లు, సర్వర్లు, విద్యుత్ పరికరాలు, కూలింగ్ వ్యవస్థలు, నెట్వర్కింగ్ సామగ్రికి డిమాండ్ పెరిగింది. ఇదే అదనుగా భావిస్తున్న కార్గో దొంగల ముఠాలు ఇప్పుడు ఖరీదైన డేటా సెంటర్ సామగ్రిపై దృష్టి సారిస్తున్నాయి.
చికాగో సమీపంలో భారీ సొత్తు స్వాధీనం
అమెరికాలోని ఇల్లినాయిస్ రాష్ట్రంలో చికాగో సమీపంలోని ఎల్క్ గ్రోవ్ టౌన్షిప్ ట్రక్యార్డులో రెండు దొంగిలించిన ట్రైలర్లను కుక్ కౌంటీ షెరీఫ్ కార్యాలయ అధికారులు గుర్తించారు. వీటిలో మొత్తం 1.3 మిలియన్ డాలర్లకు పైగా విలువైన కాపర్ వైర్లు, డేటా సెంటర్ ఇన్ఫ్రాస్ట్రక్చర్ పరికరాలు లభించాయి. భారత కరెన్సీలో వీటి విలువ రూ.10 కోట్లకు పైగానే ఉంటుంది. జూన్ 18న సుమారు 3 లక్షల డాలర్ల విలువైన కాపర్ వైర్లతో ఉన్న ట్రైలర్ నుంచి లొకేషన్ సిగ్నల్ వస్తున్నట్లు అధికారులకు సమాచారం అందింది. అలబామాలోని పైన్ హిల్ నుంచి చోరీకి గురైన ఈ ట్రైలర్ను గుర్తించిన అధికారులు, దానిలో కాపర్ వైర్లు అలాగే ఉన్నట్లు నిర్ధారించారు. ట్రైలర్పై అమర్చిన ఇండియానా నంబర్ ప్లేట్లు కూడా విస్కాన్సిన్లో దొంగిలించినవిగా తేలాయి.
మరో ట్రైలర్లో రూ.8 కోట్ల సామగ్రి
అదే వ్యక్తి వారం క్రితం మరో ట్రైలర్ను కూడా అక్కడ వదిలి వెళ్లినట్లు ట్రక్యార్డు యజమాని అధికారులకు తెలిపారు. దర్యాప్తులో ఆ ట్రైలర్ జూన్ 10న ఫ్లోరిడాలోని జాక్సన్విల్ నుంచి చోరీకి గురైనట్లు గుర్తించారు. అందులో సుమారు ఒక మిలియన్ డాలర్ల విలువైన డేటా సెంటర్ ఇన్ఫ్రాస్ట్రక్చర్ పరికరాలు లభించాయి. రెండు ట్రైలర్లను అక్కడికి తీసుకొచ్చిన డ్రైవర్తోపాటు ఈ చోరీల్లో భాగమైన ఇతర వ్యక్తులను గుర్తించేందుకు దర్యాప్తు కొనసాగుతోంది. ఇప్పటివరకు ఎవరినీ అరెస్టు చేసినట్లు అధికారులు ప్రకటించలేదు. FreightWaves
కాపర్ వైర్లకే ఎందుకు డిమాండ్?
డేటా సెంటర్లకు భారీ స్థాయిలో విద్యుత్ అవసరమవుతుంది. సర్వర్లు, కూలింగ్ వ్యవస్థలు, పవర్ డిస్ట్రిబ్యూషన్ యూనిట్లను అనుసంధానించేందుకు కాపర్ కేబుల్స్ కీలకం. కాపర్కు ప్రపంచవ్యాప్తంగా అధిక ధర ఉండటంతోపాటు దానిపై ప్రత్యేక సీరియల్ నంబర్లు లేకపోవడం వల్ల అక్రమ మార్కెట్లో విక్రయించడం సులభమవుతోంది. ప్రత్యేక డేటా సెంటర్ పరికరాలను తిరిగి విక్రయించడం మాత్రం అంత సులభం కాదు. వాటికి సీరియల్ నంబర్లు, వారంటీ, కొనుగోలు రికార్డులు ఉండటంతో తయారీ సంస్థలు లేదా కొనుగోలుదారులు వాటి మూలాన్ని గుర్తించగలరు.
భద్రత పెంచాల్సిందే!
డేటా సెంటర్ నిర్మాణ సామగ్రిని తరలించే ట్రైలర్లకు జీపీఎస్ ట్రాకర్లు అమర్చడం, మార్గమధ్యంలో ఆగే ప్రదేశాలను పర్యవేక్షించడం, డ్రైవర్ల వివరాలను ధృవీకరించడం, పరికరాల సీరియల్ నంబర్లను నమోదు చేయడం అవసరమని నిపుణులు సూచిస్తున్నారు. సప్లై చెయిన్లో చిన్న భద్రతా లోపం కూడా కోట్ల రూపాయల నష్టంతోపాటు ప్రాజెక్టుల ఆలస్యానికి కారణమవుతుంది. AI మౌలిక సదుపాయాలపై పెట్టుబడులు పెరుగుతున్న కొద్దీ వాటికి అవసరమైన విలువైన సామగ్రి రవాణా భద్రత కూడా టెక్ కంపెనీలకు ప్రధాన సవాలుగా మారనుంది.
Read also: Sai Pallavi’s Ek Din OTT Release: సాయి పల్లవి ‘ఏక్ దిన్’ ఓటీటీలోకి.. కానీ ఇండియాలో ఇంకా కాదు! ఎక్కడ చూడొచ్చు?
iOS 27 Public Beta: Siri AI మాత్రమే కాదు.. ఐఫోన్లో యూజర్లను ఆకట్టుకుంటున్న 12 సూపర్ ఫీచర్లు ఇవే!
Honda SP 125 vs TVS Raider 125: ఏది కొనాలి? మైలేజ్, ఫీచర్లు, ధర, మెయింటెనెన్స్.. పూర్తి పోలిక ఇదే!