Rashmi Gautam: తెలుగు బుల్లితెరపై అత్యంత ప్రజాదరణ పొందిన యాంకర్లలో రష్మీ గౌతమ్ ఒకరు. జబర్దస్త్, శ్రీదేవి డ్రామా కంపెనీ, డీ వంటి సూపర్ హిట్ షోలతో తనకంటూ ప్రత్యేక గుర్తింపు సంపాదించుకున్న రష్మీ.. ఇప్పుడు మరో కొత్త రియాలిటీ షోతో ప్రేక్షకులను అలరించేందుకు సిద్ధమవుతోంది. ప్రముఖ ఓటీటీ ప్లాట్ఫామ్ ఆహాలో త్వరలో ప్రారంభం కానున్న ‘టాప్ తెలుగు ఇన్ఫ్లూయెన్సర్’ షోకు హోస్ట్గా వ్యవహరించనుంది.
ఈ సందర్భంగా నిర్వహించిన కర్టెన్ రైజర్ ఈవెంట్లో పాల్గొన్న రష్మీ.. తన వ్యక్తిగత జీవితం, కుటుంబ నేపథ్యం, సినీ ప్రయాణం, భవిష్యత్ ప్రాజెక్టుల గురించి ఆసక్తికర విషయాలు పంచుకుంది.
‘మా కుటుంబంలో నేను ఒక్కదాన్నే సినిమా రంగంలోకి వచ్చా’
రష్మీ మాట్లాడుతూ.. తన కుటుంబంలో ఎవరూ సినీ రంగానికి చెందినవారు కాదని వెల్లడించింది. “మా ఫ్యామిలీ అంతా సెంట్రల్ గవర్నమెంట్ ఉద్యోగులే. మా అమ్మ మమతా గౌతమ్ ఒడిశాకు చెందినవారు. మా నాన్న రామ్ గౌతమ్ ఉత్తరప్రదేశ్కు చెందినవారు. నేను మాత్రం విశాఖపట్నంలో పుట్టి పెరిగాను.”అని చెప్పింది.
ఇంకా సరదాగా..
“మా కుటుంబ సభ్యులంతా చాలా డిగ్నిటీగా, అధికారికంగా ఉంటారు. నేను మాత్రమే దారి తప్పి సినిమా ఇండస్ట్రీలోకి వచ్చాను.”అంటూ నవ్వులు పూయించింది.
చిన్నప్పుడే తండ్రిని కోల్పోయాను
తన చిన్నతనాన్ని గుర్తు చేసుకున్న రష్మీ.. చిన్న వయసులోనే తండ్రిని కోల్పోయానని తెలిపింది. అమ్మే తనను పెంచి చదివించిందని, జీవితంలో ఎదురైన ప్రతి సవాల్ను ధైర్యంగా ఎదుర్కోవడానికి ఆమెనే ప్రేరణ అని చెప్పింది.
సీరియల్తో మొదలైన ప్రయాణం
చాలామందికి రష్మీ జబర్దస్త్ ద్వారానే పరిచయం అయినప్పటికీ.. ఆమె ప్రయాణం టెలివిజన్ సీరియల్తో ప్రారంభమైంది.’యువ’ అనే సీరియల్లో మొదటిసారి నటించినా, ఆశించిన స్థాయిలో గుర్తింపు రాలేదని తెలిపింది. ఆ తర్వాత కొంతకాలం విరామం తీసుకుని మళ్లీ అవకాశాల కోసం ప్రయత్నించగా, సినిమాల్లో చిన్న అవకాశాలు వచ్చాయని చెప్పింది. అదే సమయంలో జబర్దస్త్ యాంకర్గా అవకాశం రావడంతో తన కెరీర్ పూర్తిగా మారిపోయిందని వెల్లడించింది.
సినిమాల్లో ఎందుకు తక్కువగా కనిపిస్తున్నారు?
రష్మీ ప్రస్తుతం సినిమాల్లో ఎక్కువగా కనిపించకపోవడానికి గల కారణాన్ని కూడా వివరించింది. తనకు వచ్చే ఆఫర్లలో ఎక్కువగా స్పెషల్ సాంగ్స్ మాత్రమే ఉంటున్నాయని, అయితే అలాంటి పాత్రలు చేయడానికి ఆసక్తి చూపడం లేదని స్పష్టం చేసింది.”మంచి కథ, నటనకు ప్రాధాన్యం ఉన్న పాత్రలు వస్తే తప్పకుండా సినిమాలు చేస్తాను.”అని తెలిపింది.
ఆహాలో కొత్త రియాలిటీ షో
రష్మీ ఇప్పుడు హోస్ట్ చేయబోతున్న ‘టాప్ తెలుగు ఇన్ఫ్లూయెన్సర్’ షో గురించి కూడా మాట్లాడింది. ఈ షో ద్వారా సోషల్ మీడియా ప్రపంచంలో ప్రతిభ కనబరుస్తున్న కొత్త ఇన్ఫ్లూయెన్సర్లను ప్రేక్షకులకు పరిచయం చేయనున్నట్లు తెలిపింది. వినోదంతో పాటు కొత్త టాలెంట్ను వెలికితీసే కార్యక్రమంగా ఈ షో రూపొందిందని పేర్కొంది.
బుల్లితెరపై ఇంకా అదే క్రేజ్
దాదాపు పదేళ్లకు పైగా టెలివిజన్ రంగంలో కొనసాగుతున్న రష్మీ గౌతమ్.. యాంకర్గా తనకంటూ ప్రత్యేక ఫ్యాన్ బేస్ను ఏర్పరుచుకుంది. జబర్దస్త్తో వచ్చిన గుర్తింపును నిలబెట్టుకుంటూనే, కొత్త షోలతో ప్రేక్షకులకు చేరువవుతూ తన కెరీర్ను విజయవంతంగా కొనసాగిస్తోంది.
ఇవీ చదవండి: Rashmika Mandanna: రష్మికకు అండగా నిలిచిన కృతి సనన్.. అభిమానుల తాకిడిలో హీరోయిన్ను కాపాడిన వీడియో వైరల్
Karmeni Selvam: ‘కార్మేని సెల్వం’ టీజర్ విడుదల.. డబ్బు కోసం మనిషి చేసే పరుగుపై ఆసక్తికర కథ
Rashmika Mandanna: INCA అవార్డుల్లో తెలుగు చిత్రాల హవా.. నాగచైతన్య, రష్మికకు ఉత్తమ నటుల పురస్కారం