WhatsApp Telangana : తెలంగాణ ప్రభుత్వం ప్రజలకు ప్రభుత్వ సేవలు మరింత సులభంగా, వేగంగా అందించేందుకు సాంకేతికతను విస్తృతంగా వినియోగిస్తోంది. ఇప్పటికే అనేక సేవలను డిజిటలైజ్ చేసిన ప్రభుత్వం, ఇప్పుడు వాట్సప్ మీ-సేవ ప్లాట్ఫామ్ ద్వారా మరిన్ని కీలక సేవలను అందుబాటులోకి తీసుకురానుంది. ఈ క్రమంలో మరో కీలక నిర్ణయం తీసుకుని, ఇక నుంచి వాట్సప్ మీ-సేవ ద్వారా అత్యవసర (ఎమర్జెన్సీ) సేవలు కూడా పొందేలా ఏర్పాట్లు చేస్తోంది.
గ్యాస్ బుకింగ్ నుంచి ఎమర్జెన్సీ సేవల వరకు
ప్రస్తుతం వాట్సప్ మీ-సేవ ద్వారా ప్రభుత్వ సర్టిఫికేట్లు, దర్శన టికెట్లు, సందర్శన ప్రాంతాల ఎంట్రీ టికెట్లు, ఫిర్యాదులు, అప్లికేషన్ స్టేటస్ వంటి అనేక సేవలు అందుబాటులో ఉన్నాయి. తాజాగా ఇందులోకి గ్యాస్ సిలిండర్ బుకింగ్ సదుపాయాన్ని కూడా చేర్చనున్నారు.
అంతేకాదు, 101, 102, 108 వంటి అత్యవసర సేవలను కూడా వాట్సప్ మీ-సేవ ప్లాట్ఫామ్ ద్వారా పొందేలా ప్రభుత్వం కసరత్తు చేస్తోంది. రాబోయే రోజుల్లో అన్ని హెల్ప్లైన్ నెంబర్లను ఈ ప్లాట్ఫామ్కు అనుసంధానం చేయనున్నారు. దీంతో ఒక్క వాట్సప్ నెంబర్ ద్వారానే ప్రజలు ఎమర్జెన్సీ సహాయం పొందే అవకాశం ఉంటుంది.
ఇప్పటికే 581 సేవలు అందుబాటులో
ప్రస్తుతం రాష్ట్రవ్యాప్తంగా 581 ప్రభుత్వ సేవలు వాట్సప్ మీ-సేవ ద్వారా అందుబాటులో ఉన్నాయి. ఈ సేవల ద్వారా ప్రజలు ఇంటి నుంచే అప్లై చేయడం, అవసరమైన డాక్యుమెంట్లు పొందడం, పేమెంట్లు చేయడం వంటి సౌకర్యాలు పొందుతున్నారు. దీంతో మీ-సేవ కేంద్రాలకు వెళ్లాల్సిన అవసరం చాలా వరకు తగ్గింది.
ప్రజల నుంచి మంచి స్పందన
గత ఏడాది నవంబర్ 18న తెలంగాణ ప్రభుత్వం ఈ వాట్సప్ మీ-సేవ విధానాన్ని ప్రారంభించింది. ఈ కార్యక్రమాన్ని రాష్ట్ర ఐటీ శాఖ మంత్రి శ్రీధర్ బాబు ప్రారంభించారు. ప్రజలు 8096958096 వాట్సప్ నెంబర్కు మెసేజ్ పంపి 24 గంటలపాటు సేవలు పొందవచ్చు. ఇప్పటివరకు రాష్ట్రవ్యాప్తంగా సుమారు 4.5 లక్షల మంది ఈ సేవలను వినియోగించారు. ముఖ్యంగా గ్రామీణ ప్రాంతాల ప్రజలకు ఇది ఎంతో ఉపయోగకరంగా మారింది. పట్టణాలకు వెళ్లే సమయం, ప్రయాణ ఖర్చులు రెండూ ఆదా అవుతున్నాయి.
డిజిటల్ తెలంగాణ దిశగా మరో అడుగు
వాట్సప్ మీ-సేవకు ఎమర్జెన్సీ సేవలను జోడించడం ద్వారా తెలంగాణ ప్రభుత్వం డిజిటల్ గవర్నెన్స్ దిశగా మరో కీలక అడుగు వేసినట్లయింది. రానున్న రోజుల్లో మరిన్ని సేవలను ఈ ప్లాట్ఫామ్లో చేర్చాలని ప్రభుత్వం యోచిస్తోంది.
ఇవీ చదవండి: RTC Tickets Booking: కేవలం 3 నిమిషాల్లోనే ఆర్టీసీ టికెట్ బుకింగ్.. వాట్సప్లో ఈ ఒక్క నెంబర్ చాలు!
WhatsApp: వాట్సప్లో డిలీట్ చేసిన మెసేజ్లు ఎలా చూడాలంటే..