Telangana : భూమి కోసం, భుక్తి కోసం, వెట్టిచాకిరి విముక్తి కోసం పోరాడిన మహనీయుడు Ravi Narayana Reddyకి తెలంగాణ సమాజంలో తగిన స్థానం కల్పిస్తామని ముఖ్యమంత్రి A. Revanth Reddy హామీ ఇచ్చారు. రావి నారాయణ రెడ్డి చరిత్రను పాఠ్యాంశంగా చేర్చడం, ఆయన విగ్రహాన్ని ఏర్పాటు చేయడం వంటి అంశాలపై అందరితో చర్చించి, మంత్రిమండలిలో నిర్ణయం తీసుకుని గౌరవాన్ని మరింత పెంచుతామని సీఎం స్పష్టం చేశారు.
‘తెలంగాణ అమరవీరుల స్మారక ట్రస్టు’ ఆధ్వర్యంలో నిర్వహించిన కార్యక్రమంలో, స్వాతంత్య్ర సమరయోధుడు, పద్మవిభూషణ్ రావి నారాయణ రెడ్డి పేరిట ఏర్పాటు చేసిన ‘రావి నారాయణ రెడ్డి స్మారక జాతీయ పురస్కారం – 2025’ను సీఎం రేవంత్ రెడ్డి చేతుల మీదుగా సుప్రీంకోర్టు మాజీ న్యాయమూర్తి Justice B. Sudarshan Reddyకి అందజేశారు.
ఈ సందర్భంగా సీఎం మాట్లాడుతూ, అరాచక శక్తులకు వ్యతిరేకంగా జరిగిన సాయుధ రైతాంగ పోరాటంలో రావి నారాయణ రెడ్డి కీలక పాత్ర పోషించారని గుర్తు చేశారు. భూస్వామ్య కుటుంబంలో పుట్టినా, పేద ప్రజల కోసం తనకు చెందిన 500 ఎకరాల భూమిని దానం చేసిన గొప్ప వ్యక్తిత్వమని కొనియాడారు. “బండెనక బండి కట్టి, పదహారు బండ్లు కట్టి” అంటూ తెలంగాణ సమాజాన్ని చైతన్యం చేసిన బండి యాదగిరి లాంటి నిరక్షరాస్యులను కూడా ప్రభావితం చేసిన నాయకుడు రావి నారాయణ రెడ్డి అని అన్నారు.
దేశంలో తొలి సారిగా జరిగిన పార్లమెంట్ ఎన్నికల్లో, దేశపు మొదటి ప్రధాని Jawaharlal Nehruకన్నా ఎక్కువ మెజారిటీతో ఎంపీగా ఎన్నికయ్యారని సీఎం గుర్తుచేశారు. ప్రజా తీర్పుకు ప్రతీకగా ఆనాటి తొలి పార్లమెంట్ భవనాన్ని నెహ్రూ గారు రావి నారాయణ రెడ్డితో ప్రారంభింపజేయడం ఆయన గౌరవాన్ని చాటుతుందని తెలిపారు.
అలాగే 60 ఏళ్ల వయసులోనే పార్టీ, రాజకీయ పదవుల నుంచి తప్పుకొని ప్రజలకు స్ఫూర్తిగా నిలిచిన అరుదైన నాయకుడు రావి నారాయణ రెడ్డని సీఎం పేర్కొన్నారు. మున్సిపల్ ఎన్నికల అనంతరం ఆయనకు సముచిత గౌరవం ఇచ్చేందుకు అవసరమైన చర్యలు చేపడతామని స్పష్టం చేశారు.
రావి నారాయణ రెడ్డి జాతీయ పురస్కారం జస్టిస్ సుదర్శన్ రెడ్డికి దక్కడం పూర్తిగా సముచితమని సీఎం రేవంత్ రెడ్డి అభిప్రాయపడ్డారు. తొలి తరంలో బూర్గుల రామకృష్ణారావు, రావి నారాయణ రెడ్డి వంటి నేతలు స్ఫూర్తినిస్తే, మలితరంలో ఎస్. జైపాల్ రెడ్డి, సుదర్శన్ రెడ్డి లాంటి వ్యక్తులు తెలంగాణ సమాజానికి మార్గదర్శకులుగా నిలిచారని తెలిపారు. రాష్ట్ర ఏర్పాటు ప్రక్రియలో సుదర్శన్ రెడ్డి పోషించిన పాత్ర చారిత్రాత్మకమని, ఆయన అనుభవాలు నేటి పరిపాలనకు ఉపయోగపడుతున్నాయని చెప్పారు.
హైదరాబాద్లోని రావి నారాయణ రెడ్డి ఆడిటోరియంలో జరిగిన ఈ కార్యక్రమంలో ట్రస్టు అధ్యక్షుడు చాడ వెంకట్ రెడ్డి, కార్యదర్శి కందిమళ్ల ప్రతాప్ రెడ్డి, ప్రజాప్రతినిధులు, పలువురు ప్రముఖులు పాల్గొన్నారు. మొత్తం మీద ఈ కార్యక్రమం తెలంగాణ చరిత్రలో ఒక మహనీయుడికి తగిన గౌరవం కల్పించే దిశగా కీలక అడుగుగా నిలిచింది.
ఇవీ చదవండి: Lokesh with Revanth : దావోస్లో తెలంగాణ సీఎం రేవంత్ రెడ్డిని కలిసిన మంత్రి లోకేష్.. తెలుగు రాష్ట్రాల అభివృద్ధిపై కీలక చర్చ
Hyderabad : హైదరాబాద్ను హాలీవుడ్ స్థాయికి తీసుకెళ్దాం: రేవంత్ రెడ్డి