Vikarabad Crime : వికారాబాద్ జిల్లా బంట్వారం మండలం యాచారం గ్రామంలో చోటుచేసుకున్న దారుణ ఘటన రాష్ట్రవ్యాప్తంగా సంచలనం సృష్టించింది. ఇన్స్టాగ్రామ్ ద్వారా పరిచయమైన యువకుడితో ప్రేమ వివాహానికి తల్లిదండ్రులు అంగీకరించలేదనే కారణంతో… కన్న కూతురే వారిని హత్య చేసిన ఘటన వెలుగులోకి వచ్చింది. యాచారం గ్రామానికి చెందిన నక్క సురేఖ (వయసు సుమారు 23 ఏళ్లు) స్థానికంగా ఓ నర్సింగ్ హోంలో నర్స్గా విధులు నిర్వహిస్తోంది. రెండు సంవత్సరాల క్రితం ఆమెకు ఇన్స్టాగ్రామ్ ద్వారా ఓ యువకుడితో పరిచయం ఏర్పడింది. ఆ పరిచయం క్రమంగా ప్రేమగా మారింది.
ఈ విషయం తెలిసిన సురేఖ తల్లిదండ్రులు — కులాంతర వివాహమని, కుటుంబ పరువు పోతుందని భావించి ఈ పెళ్లికి తీవ్రంగా వ్యతిరేకించారు. పలుమార్లు కుమార్తెకు నచ్చజెప్పే ప్రయత్నం చేశారు. అయితే ప్రేమలో మునిగిపోయిన సురేఖ మాత్రం వారి నిర్ణయాన్ని అంగీకరించలేకపోయింది.
నర్సింగ్ హోం నుంచే మత్తు ఇంజెక్షన్లు
తల్లిదండ్రుల అడ్డంకులను తొలగించుకోవాలనే దురుద్దేశంతో సురేఖ భయంకరమైన ప్లాన్ వేసింది. తాను పనిచేస్తున్న నర్సింగ్ హోం నుంచి అనస్థీషియా (మత్తు మందు) ఇంజెక్షన్లను తీసుకొచ్చింది. ఒక రోజు రాత్రి తల్లిదండ్రులకు “శరీర నొప్పులు తగ్గే మందు” అంటూ నమ్మించి అధిక మోతాదులో మత్తు మందు కలిగిన ఇంజెక్షన్లు ఇచ్చింది. కొద్దిసేపటికే ఇద్దరూ అపస్మారక స్థితిలోకి వెళ్లి ప్రాణాలు కోల్పోయారు.
సహజ మరణమని కుటుంబానికి సమాచారం
తల్లిదండ్రులు మరణించిన తర్వాత ఇది సహజ మరణమేనని చూపించేందుకు ప్రయత్నించిన సురేఖ, తన అన్నకు ఫోన్ చేసి “అమ్మానాన్న అచేతనంగా పడిపోయారు” అంటూ సమాచారం ఇచ్చింది. అయితే పరిస్థితులు అనుమానాస్పదంగా ఉండటంతో కుటుంబ సభ్యులు పోలీసులకు ఫిర్యాదు చేశారు.
పోలీసుల విచారణలో నిజం వెలుగులోకి
పోలీసులు కేసు నమోదు చేసి విచారణ ప్రారంభించగా, ఇంజెక్షన్ల ఆనవాళ్లు, నర్సింగ్ హోం నేపథ్యం, సురేఖ ప్రవర్తన అన్నీ అనుమానాలకు దారి తీశాయి. తీవ్రంగా ప్రశ్నించగా చివరకు తానే తల్లిదండ్రులను హత్య చేశానని సురేఖ పోలీసుల ముందు అంగీకరించింది. ప్రస్తుతం నిందితురాలిని అదుపులోకి తీసుకున్న పోలీసులు, ఆమె ప్రియుడు పాత్రపై కూడా దర్యాప్తు కొనసాగిస్తున్నారు.
సమాజాన్ని కుదిపేసిన ఘటన
ఇన్స్టాగ్రామ్ పరిచయం నుంచి మొదలైన ప్రేమ, చివరకు కన్నవాళ్ల ప్రాణాలు తీసే స్థాయికి వెళ్లడం సమాజాన్ని ఆలోచనలో పడేసింది. ప్రేమ, స్వేచ్ఛ పేరుతో కుటుంబ సంబంధాలపై జరుగుతున్న ఈ తరహా నేరాలు ఎంతటి ప్రమాదకరమో ఈ ఘటన మరోసారి రుజువు చేసింది.
ఇవీ చదవండి: Telangana crime : తిరిగిరాని లోకాలకు వెళ్తారనుకోలేదు.. నానమ్మను చూసేందుకు వచ్చి ముగ్గురు చిన్నారులు
Guntur Crime : వైన్ షాపులోకి వచ్చి మహిళ హల్చల్: విక్టిమ్పై దాడి, ఆపై పోలీస్ ఫిర్యాదు