CBSE Rules : సెంట్రల్ బోర్డ్ ఆఫ్ సెకండరీ ఎడ్యుకేషన్ (CBSE) విద్యార్థులకు కొత్త నిబంధనలు అమల్లోకి తెచ్చింది. జాతీయ విద్యా విధానం (NEP) 2020 అమలు మరింత బలోపేతం కావడానికి, విద్యార్థుల్లో క్రమశిక్షణ పెంచడానికి, డమ్మీ అడ్మిషన్లను అరికట్టడానికి బోర్డు ఈ మార్గదర్శకాలను ప్రకటించింది. ఇకపై రెగ్యులర్ క్లాసులకు హాజరు కాకుండా పరీక్షలు రాయడం సాధ్యం కాదు.
కీలక మార్పులు
10వ మరియు 12వ తరగతిలను బోర్డు రెండేళ్ల ప్రోగ్రామ్లుగా పరిగణిస్తుంది. అంటే 9-10 తరగతులు కలిపి 10వ తరగతి కోర్సు అవుతుంది. అలాగే 11-12 కలిపి 12వ తరగతి కోర్సుగా పరిగణించబడుతుంది.
ఏ విద్యార్థి బోర్డు పరీక్షలకు అర్హత పొందాలంటే కనీసం 75% హాజరు తప్పనిసరిగా ఉండాలి.
పాఠశాలలు విద్యార్థుల రోజువారీ హాజరు రిజిస్టర్ నిర్వహించాలి.
హాజరుకు మినహాయింపు
తీవ్రమైన వైద్య సమస్యలు, జాతీయ స్థాయి క్రీడలు, సాంస్కృతిక కార్యక్రమాలులో పాల్గొన్న సందర్భాల్లో మాత్రమే 25% వరకు మినహాయింపు ఉంటుంది.
అయితే, దీనికి చెల్లుబాటు అయ్యే డాక్యుమెంటేషన్ తప్పనిసరి.
సరైన కారణాలు లేకుండా తక్కువ హాజరు ఉన్నవారు పరీక్షలకు అనర్హులుగా పరిగణించబడతారు.
ఇంటర్నల్ అసెస్మెంట్
ఇకపై ఇంటర్నల్ అసెస్మెంట్ ఐచ్ఛికం కాదు, తప్పనిసరి.
ఈ మూల్యాంకనం రెండేళ్లపాటు నిరంతరంగా నిర్వహించబడుతుంది.
పాఠశాలకు హాజరు కాని విద్యార్థులు ఈ అసెస్మెంట్లో పాల్గొనలేరు.
ఇంటర్నల్ అసెస్మెంట్ రికార్డులు లేకుంటే CBSE ఫలితాలను విడుదల చేయదు. థియరీ పరీక్షలు రాసినా, అటువంటి విద్యార్థులు ‘Essential Repeat’ కేటగిరీలో ఉంచబడతారు.
సబ్జెక్టుల ఎంపిక
10వ తరగతి విద్యార్థులు తప్పనిసరి 5 సబ్జెక్టులతో పాటు 2 అదనపు సబ్జెక్టులు ఎంచుకోవచ్చు.
12వ తరగతి విద్యార్థులకు మాత్రం ఒక అదనపు సబ్జెక్టు మాత్రమే అనుమతించబడుతుంది.
ఈ సబ్జెక్టులు రెండేళ్లపాటు చదవడం తప్పనిసరి.
ఉపాధ్యాయులు, స్కూల్ అనుమతి లేకుండా విద్యార్థులు సబ్జెక్టులను నమోదు చేసుకోవడానికి వీలులేదు.
ప్రైవేట్ అభ్యర్థులు
గతంలో కంపార్ట్మెంట్ లేదా ఎసెన్షియల్ రిపీట్లో ఉన్న విద్యార్థులు ప్రైవేట్ కేటగిరీ ద్వారా మాత్రమే పరీక్ష రాయాలి.
రెండేళ్ల కోర్సు, హాజరు నిబంధనలు పాటించని వారు అదనపు సబ్జెక్టులకు ప్రైవేట్ అభ్యర్థులుగా కూడా నమోదు చేసుకోవడానికి అర్హులు కారు.
సమగ్ర విధానం
CBSE ఇప్పుడు 360 డిగ్రీల మూల్యాంకన విధానం అమలు చేస్తోంది. ఇది కేవలం పరీక్షలకే కాకుండా సంవత్సరం పొడవునా అభ్యాసం, క్రమశిక్షణ, హాజరు, అసెస్మెంట్ అన్నింటినీ పరిగణనలోకి తీసుకుంటుంది. ఈ సంస్కరణలు NEP-2020 లక్ష్యాలకు అనుగుణంగా ఉండి, పరీక్షలపై ఆధారపడే పద్ధతికి బదులుగా సమగ్ర అభ్యాసానికి ప్రాధాన్యం ఇస్తాయి.
ఇవీ చదవండి: E-Office: ఈ-ఆఫీస్ వ్యవస్థలో కీలక ముందడుగు.. మరింత మెరుగుపరిచేలా అప్గ్రెడేషన్