Prithviraj Sukumaran: మలయాళ సినిమాలకు తెలుగులో ప్రత్యేకమైన ప్రేక్షకాభిమానం ఉంది. ముఖ్యంగా క్రైమ్, ఇన్వెస్టిగేషన్, సస్పెన్స్, హీస్ట్ థ్రిల్లర్ కథాంశాలతో తెరకెక్కిన సినిమాలకు ఓటీటీలో మంచి ఆదరణ లభిస్తోంది. థియేటర్లలో పెద్దగా ప్రభావం చూపించని సినిమాలు సైతం డిజిటల్ రిలీజ్ తర్వాత ప్రేక్షకులను ఆకట్టుకుంటున్నాయి. ఇప్పుడు అలాంటి మరో మలయాళ థ్రిల్లర్ మూవీ ఓటీటీలోకి వచ్చేందుకు సిద్ధమైంది. పృథ్వీరాజ్ సుకుమారన్, పార్వతి తిరువోతు ప్రధాన పాత్రల్లో నటించిన ఐ నోబడీ మూవీ డిజిటల్ స్ట్రీమింగ్‌కు రెడీ అయింది.
ఐ నోబడీ ఓటీటీ రిలీజ్ డేట్
పృథ్వీరాజ్ సుకుమారన్ నటించిన ఐ నోబడీ సినిమా జూలై 9, 2026న థియేటర్లలో విడుదలైంది. ఈ మూవీకి నిస్సామ్ బషీర్ దర్శకత్వం వహించారు. థియేట్రికల్ రన్ తర్వాత ఇప్పుడు ఓటీటీ ప్రేక్షకుల ముందుకు తీసుకొస్తున్నారు. ఆగస్టు 25, 2026 నుంచి డిస్నీ+ హాట్‌స్టార్‌లో ఐ నోబడీ స్ట్రీమింగ్ కానుంది. ఈ విషయాన్ని చిత్రబృందం అధికారికంగా ప్రకటించింది.
పృథ్వీరాజ్ సుకుమారన్ మరో డిఫరెంట్ పాత్రలో
సలార్, వారణాసి వంటి సినిమాలతో తెలుగు ప్రేక్షకులకు మరింత దగ్గరైన పృథ్వీరాజ్ సుకుమారన్.. ఐ నోబడీలో మాత్రం పూర్తిగా భిన్నమైన పాత్రలో కనిపించారు. రాజీవన్ అనే సాధారణ ప్రభుత్వ ఉద్యోగి పాత్రలో ఆయన నటించారు. ఎలాంటి హడావిడి లేకుండా భార్య, ఇద్దరు కూతుళ్లతో ప్రశాంతంగా జీవించే వ్యక్తిగా ఆయన క్యారెక్టర్‌ను డిజైన్ చేశారు. పార్వతి తిరువోతు ఆయన భార్య మీరా పాత్రలో నటించారు. విజయరాఘవన్, అశోకన్, నందు, సూరజ్ వెంజారమూడు తదితరులు కీలక పాత్రల్లో కనిపించారు. ఈ సినిమా యాక్షన్, క్రైమ్, థ్రిల్లర్ అంశాలను కలిపి తెరకెక్కించారు. బాక్సాఫీస్ వివరాల ప్రకారం కేరళలోనే ఈ సినిమాకు ఇతర ప్రాంతాల కంటే మెరుగైన స్పందన లభించింది.
రూ.17 కోట్ల డబ్బు చుట్టూ అసలు కథ
ఐ నోబడీ కథ రాజీవన్ చుట్టూ తిరుగుతుంది. సెక్రటేరియట్‌లో ఉద్యోగం చేసే రాజీవన్ తన భార్య, ఇద్దరు కూతుళ్లతో సాధారణ జీవితం గడుపుతుంటాడు. అయితే ఒకరోజు జరిగిన బ్యాంక్ దోపిడీ అతని జీవితాన్ని పూర్తిగా మార్చేస్తుంది. బ్యాంక్‌లో ఉన్న సమయంలో దొంగలు రాజీవన్‌పై దాడి చేసి తమ కారులో బందీగా తీసుకెళ్తారు. అనంతరం అతడిని వదిలేయాలని ప్రయత్నించే సమయంలో అనుకోకుండా ప్రమాదం జరుగుతుంది. ఈ ప్రమాదంలో రాజీవన్ ప్రాణాలతో బయటపడగా, దొంగలు అక్కడికక్కడే మరణిస్తారు.
పోలీసులు కేసును దర్యాప్తు చేయడం మొదలుపెట్టిన తర్వాత అసలు ట్విస్ట్ బయటపడుతుంది. దోపిడీకి గురైన రూ.17 కోట్ల నగదు కనిపించకుండా పోతుంది. దొంగలు చనిపోయారు.. రాజీవన్ ప్రాణాలతో బయటపడ్డాడు.. కానీ కోట్ల రూపాయల డబ్బు మాత్రం మాయమైంది. దీంతో ఆ డబ్బు ఎక్కడికి వెళ్లింది? ఎవరు తీసుకున్నారు? రాజీవన్‌కు దీనితో ఏమైనా సంబంధం ఉందా? అనే ప్రశ్నలు కథలో ఆసక్తిని పెంచుతాయి.
ఓటీటీలో మరింత ఆసక్తి పెంచే అవకాశం
థియేటర్లలో పెద్దగా మెప్పించలేకపోయినప్పటికీ హీస్ట్, క్రైమ్, సస్పెన్స్ థ్రిల్లర్ సినిమాలను ఇష్టపడే ఓటీటీ ప్రేక్షకులకు ఐ నోబడీ ఆసక్తికరమైన ఆప్షన్‌గా మారే అవకాశం ఉంది. ముఖ్యంగా పృథ్వీరాజ్ సుకుమారన్, పార్వతి తిరువోతు వంటి నటీనటులు ఉండటం సినిమాపై ఆసక్తిని పెంచుతోంది. కథలో దాచిన రూ.17 కోట్ల మిస్టరీకి సమాధానం ఏంటి? రాజీవన్ నిజంగా అమాయకుడేనా? లేక అతడికి ఈ దోపిడీతో ఏదైనా సంబంధం ఉందా? అనే ప్రశ్నలకు సమాధానం తెలుసుకోవాలంటే ఆగస్టు 25 వరకు వేచి చూడాల్సిందే.
Read also: Lenin OTT: లెనిన్ ఓటీటీలో సెన్సేషన్.. వారం రోజుల్లోనే 200 మిలియన్ స్ట్రీమింగ్ నిమిషాలు.. అఖిల్‌కు మరో బిగ్ సక్సెస్
Jailer 2 OTT Rights: రజినీకాంత్ జైలర్ 2 ఓటీటీ రైట్స్ భారీ ధరకు! రూ.160 కోట్ల డీల్ నిజమేనా?
Shambhala OTT: ఓటీటీలో దూసుకుపోతున్న ఆది సాయికుమార్ శంబాల.. అసలు కథ ఏంటంటే?
Stephen OTT: తొమ్మిది హత్యలు.. పోలీస్ స్టేషన్‌కు వెళ్లి లొంగిపోయిన సీరియల్ కిల్లర్.. ఈ సినిమా మిస్ కావద్దు
