IPL 2026: ఇండియన్ ప్రీమియర్ లీగ్ (IPL) 2026 సీజన్‌కు ముందు క్రికెట్ వర్గాల్లో ఒక సంచలన వార్త చర్చనీయాంశంగా మారింది. చెన్నై సూపర్ కింగ్స్ (CSK) మరియు రాజస్థాన్ రాయల్స్ (RR) మధ్య ఒక మెగా ట్రేడ్ డీల్ జరగవచ్చని ఊహాగానాలు జోరందుకున్నాయి. ఈ డీల్‌లో ముగ్గురు కీలక ప్లేయర్లు – రవీంద్ర జడేజా, సామ్ కరన్, మరియు సంజూ శాంసన్ భాగం కావచ్చు.
ఈ ట్రేడ్ డీల్ కార్యరూపం దాల్చితే, జడేజా మరియు సామ్ కరన్ రాజస్థాన్ రాయల్స్ జెర్సీలో కనిపించవచ్చు, అయితే సంజూ శాంసన్ చెన్నై సూపర్ కింగ్స్‌లో చేరే అవకాశం ఉంది. ఈ ఊహాగానాలు ఐపీఎల్ మార్కెట్‌లో తీవ్ర అలజడిని సృష్టిస్తున్నాయి.
జడేజా షరతు: RR కెప్టెన్సీ కోరుతున్న స్టార్ ఆల్-రౌండర్
రవీంద్ర జడేజా రాజస్థాన్ రాయల్స్‌లో చేరడానికి ఒక స్పష్టమైన షరతు విధించినట్లు తెలుస్తోంది. తనను జట్టులోకి తీసుకుంటే కెప్టెన్సీ పగ్గాలు అప్పగించాలని కోరినట్లు సమాచారం. 37 ఏళ్ల జడేజా తన కెరీర్ చివరి దశలో ఒక జట్టుకు నాయకత్వం వహించి ట్రోఫీ గెలిపించాలని కలలు కంటున్నాడు.
రాజస్థాన్ మేనేజ్‌మెంట్ మొదట్లో యశస్వి జైస్వాల్ లేదా రియాన్ పరాగ్‌లను భవిష్యత్ కెప్టెన్‌లుగా సిద్ధం చేయాలని భావించింది. అయితే, జడేజా అనుభవాన్ని దృష్టిలో ఉంచుకుని ఇప్పుడు ఫ్రాంచైజీ వైఖరి మారే అవకాశం ఉంది. ఈ షరతుపై రాజస్థాన్ తీవ్రంగా ఆలోచిస్తోంది. ఈ నిర్ణయం RR జట్టుకు ఒక పెద్ద మలుపు కానుంది.
సంజూ శాంసన్ రాకతో CSKలో మార్పులు
ఒకవేళ ఈ ట్రేడ్ డీల్ ఖరారైతే, సంజూ శాంసన్ చెన్నై సూపర్ కింగ్స్‌లో చేరడం దాదాపు ఖాయం. సంజూ బ్యాటింగ్ నైపుణ్యం, వికెట్ కీపింగ్ సామర్థ్యం మరియు లీడర్‌షిప్ క్వాలిటీస్ CSKకు పెద్ద బలాన్ని చేకూర్చవచ్చు.
అయితే, ప్రస్తుతం రుతురాజ్ గైక్వాడ్ సీఎస్‌కే కెప్టెన్‌గా ఉన్నాడు, అతన్ని ఫ్రాంచైజీ భవిష్యత్ కెప్టెన్‌గా ప్రకటించింది. సంజూ రాకతో జట్టు టాప్ ఆర్డర్ మరింత బలంగా మారుతుంది. అయితే, భవిష్యత్తులో అతను రుతురాజ్ నుండి కెప్టెన్సీ పగ్గాలు చేపడతాడా లేదా అనేది క్రికెట్ అభిమానులందరిలో ఉత్సుకతను రేకెత్తిస్తోంది. సంజూ శాంసన్ రాక రుతురాజ్ కెప్టెన్సీకి ముప్పుగా పరిణమించవచ్చని మార్కెట్‌లో చర్చ జరుగుతోంది.
జడేజా, CSK బంధం: ఒక చరిత్ర
రవీంద్ర జడేజా, చెన్నై సూపర్ కింగ్స్ మధ్య సుదీర్ఘ కాలంగా బంధం ఉంది. 2012లో జట్టులో చేరిన తర్వాత జడేజా అద్భుత ప్రదర్శనలతో రెండుసార్లు టైటిల్ గెలవడంలో కీలక పాత్ర పోషించాడు. అయితే, 2022 సీజన్‌లో ధోని కెప్టెన్సీని జడేజాకు అప్పగించినప్పుడు, జట్టు ప్రదర్శన ఆశించిన స్థాయిలో లేదు. ఎనిమిది మ్యాచ్‌లలో కేవలం రెండింటిని మాత్రమే గెలిచిన తర్వాత జడేజా కెప్టెన్సీని వదులుకోవాల్సి వచ్చింది. ఆ తర్వాత ధోని తిరిగి బాధ్యతలు చేపట్టి జట్టును విజయపథంలో నడిపించాడు.
ఐపీఎల్ 2026 వేలంకు ముందే ఈ మెగా ట్రేడ్ డీల్ గురించి ఒక నిర్ణయం వెలువడే అవకాశం ఉంది. ఒకవేళ జడేజా రాజస్థాన్‌కు వెళ్లి, శాంసన్ చెన్నైలో చేరితే, ఇది ఐపీఎల్ చరిత్రలోనే అతిపెద్ద ట్రేడ్‌లలో ఒకటిగా నిలిచిపోవచ్చు. ఈ కెప్టెన్ ఎక్స్ఛేంజ్‌పై బీసీసీఐ ఆమోదం కోసం రెండు జట్ల అభిమానులు ఉత్కంఠగా ఎదురుచూస్తున్నారు.
ఇవీ చదవండి: Sanju Samson: ధోనిని దాటేసిన సంజూ శాంసన్.. ఎందులో అంటే!
Ravindra Jadeja: స్టొయినిస్‌ కళ్లు బైర్లు కమ్మాయి.. జడేజా సూపర్ డెలివరీ చూశారా!
