Tollywood Actress : బుల్లితెర ప్రేక్షకులను మరోసారి షాక్కు గురిచేస్తూ మరో సెలబ్రిటీ జంట తమ బ్రేకప్ విషయాన్ని బహిర్గతం చేసింది. ఇటీవలే సీరియల్ నటి అనుష హెగ్డే తన భర్తతో విడాకులు తీసుకున్నట్లు సోషల్ మీడియాలో వెల్లడించగా, ఇప్పుడు మరో టీవీ నటి కీర్తి భట్ తన ప్రేమ బంధానికి ముగింపు పలికినట్లు అధికారికంగా ప్రకటించింది. పెళ్లి కాకుండానే తమ రిలేషన్ ముగిసిందని ఆమె సోషల్ మీడియా వేదికగా తెలిపింది.
మనసిచ్చి చూడు నుంచి బిగ్ బాస్ వరకూ
కీర్తి భట్ తెలుగు ప్రేక్షకులకు ‘మనసిచ్చి చూడు’ సీరియల్ ద్వారా పరిచయమైంది. ఆ తర్వాత బిగ్ బాస్ తెలుగు షోలో పాల్గొని తన నిజ జీవిత కథను చెప్పి ప్రేక్షకులను భావోద్వేగానికి గురి చేసింది. షోలో ఆమె చెప్పిన జీవిత సంఘటనలు అప్పట్లో అందరినీ కంటతడి పెట్టించాయి. రోడ్డు ప్రమాదంలో తల్లిదండ్రులను కోల్పోవడం, ఆ ప్రమాదంలో తాను తీవ్రంగా గాయపడటం, పిల్లలు పుట్టే అవకాశమే లేదని వైద్యులు చెప్పడం… ఇవన్నీ ఆమె జీవితాన్ని తీవ్ర మానసిక సంఘర్షణలోకి నెట్టాయి.
ఒంటరి జీవితం… దత్తత తీసుకున్న చిన్నారి విషాదం
ఎవరూ లేని పరిస్థితిలో ఒంటరిగా జీవితాన్ని ప్రారంభించిన కీర్తి భట్, ఓ అనాథ చిన్నారిని దత్తత తీసుకుంది. అయితే ఆ చిన్నారి కూడా బిగ్ బాస్ షోకు ముందే మృతి చెందడం ఆమె జీవితంలో మరో తీరని విషాదంగా మారింది.
ఈ ఘటనలన్నీ ఆమెను భావోద్వేగంగా పూర్తిగా కుదిపేశాయి.
బిగ్ బాస్ తర్వాత కొత్త ప్రేమ
బిగ్ బాస్ షో నుంచి బయటకు వచ్చిన తర్వాత తన జీవితంలోకి వచ్చిన కొత్త ప్రేమను కీర్తి భట్ ప్రేక్షకులకు పరిచయం చేసింది. హీరో విజయ్ కార్తీక్తో ఆమె ప్రేమలో ఉన్నట్లు అప్పట్లో బహిరంగంగా వెల్లడించింది. రెండేళ్ల క్రితం వీరిద్దరి మధ్య ఎంగేజ్మెంట్ కూడా జరిగింది. చాలా కాలంగా లివింగ్ రిలేషన్షిప్లో ఉన్న ఈ జంట పలు టీవీ షోలలో కలిసి సందడి చేసింది. వారి మధ్య త్వరలో పెళ్లి జరుగుతుందని అప్పట్లో అభిమానులు భావించారు.
“ఈ బంధం నిజమైనదే… కానీ భర్తగా మారలేకపోయాడు” అయితే ఇప్పుడు ఈ బంధానికి ఎండ్ కార్డ్ వేసినట్లు కీర్తి భట్ ప్రకటించింది. తన సోషల్ మీడియా పోస్ట్లో భావోద్వేగంగా స్పందిస్తూ — “ఈ బంధం చాలా రోజులుగా కొనసాగింది. ఇది నిజమైనదే. కానీ ఈ రిలేషన్ ఎప్పుడూ జీవిత భాగస్వామిగా లేదా భర్తగా మారినట్టు అనిపించలేదు. ఇకపై మేమిద్దరం మంచి స్నేహితులుగానే కొనసాగుతాం” అంటూ స్పష్టం చేసింది.
అభిమానుల్లో మిశ్రమ స్పందన
కీర్తి భట్ నిర్ణయంపై సోషల్ మీడియాలో మిశ్రమ స్పందన కనిపిస్తోంది. కొందరు ఆమె ధైర్యాన్ని మెచ్చుకుంటే, మరికొందరు ఈ జంట విడిపోవడంపై బాధ వ్యక్తం చేస్తున్నారు. ఇటీవల కాలంలో బుల్లితెర సెలబ్రిటీల బ్రేకప్ వార్తలు వరుసగా వెలుగులోకి వస్తుండటం ఇండస్ట్రీలోనూ చర్చనీయాంశంగా మారింది.
ఇవీ చదవండి: Mrunal Thakur : ఆమె మాటలే నాకు ధైర్యం.. హాలీవుడ్ నటిపై మృణాళ్ ఠాకూర్ భావోద్వేగ వ్యాఖ్యలు
Actress Poorna: నటి పూర్ణ రెండోసారి.. మెటర్నిటీ ఫొటోషూట్ పిక్స్ వైరల్