Viral: రాజస్థాన్లోని Tonk district నుంచి ఒక షాకింగ్ ఘటన వెలుగుచూసింది. నివాయ్ పోలీస్ స్టేషన్ పరిధిలోని సిద్రా గ్రామ సమీపంలోని నిర్మానుష్య ప్రదేశంలో భూమిని తవ్వుతుండగా, భూగర్భంలో పాతిపెట్టినట్లు కనిపించే భారీ లోహపు గంగాళం బయటపడింది. దాని లోపల బంగారం లాంటి మెరుపుతో ఉన్న లోహపు ముక్కలు ఉన్నాయన్న పుకార్లు వ్యాపించడంతో, క్షణాల్లోనే గ్రామాల నుంచి జనాలు అక్కడికి చేరుకుని పరిస్థితి ఉద్రిక్తంగా మారింది.
శనివారం సాయంత్రం బంజరు భూమిలో కొన్ని పూజా వస్తువులు కనిపించడంతో అనుమానాలు మొదలయ్యాయి. “ఇక్కడ పాత నిధి ఉండొచ్చు” అన్న వార్త గ్రామం అంతటా వ్యాపించగానే, ప్రజలు గుమిగూడారు. సమాచారం అందుకున్న రెవెన్యూ అధికారులు సంఘటనా స్థలానికి చేరుకుని, పరిస్థితిని అంచనా వేసి JCBతో తవ్వకాలు చేపట్టారు. కొద్ది సేపటికే భూమికి సుమారు 10 అడుగుల లోతులో ఒక పెద్ద లోహపు గంగాళం బయటపడింది.
బయటకు తీసిన గంగాళం సుమారు 2 అడుగుల ఎత్తు, 1.5 అడుగుల వెడల్పు ఉండగా, మొత్తం బరువు 100–150 కిలోల మధ్య ఉంటుందని అంచనా వేశారు. పైభాగంలో బంగారం లాంటి మెరిసే లోహపు ముక్కలు కనిపించడంతో, ఇది చాలా పురాతనమై ఉండొచ్చని స్థానికులు భావిస్తున్నారు. ప్రస్తుతం ఇలాంటి లోహపు గంగాళాలు వినియోగంలో లేవని, అందుకే చారిత్రక ప్రాముఖ్యత ఉండే అవకాశం ఉందని అధికారులు చెబుతున్నారు.
గంగాళాన్ని బయటకు తీసిన వెంటనే అక్కడ ఉన్న జనసందోహం అదుపు తప్పింది. కొందరు లోపల ఉన్న వస్తువులను దక్కించుకుని పారిపోవడానికి ప్రయత్నించగా, పోలీసులు తక్షణమే రంగంలోకి దిగారు. కొంతమంది చేతుల్లో లోహపు ముక్కలతో పొలాల వైపు పరుగులు తీశారని సమాచారం. పరిస్థితిని అదుపు చేసేందుకు పోలీసులు కఠిన చర్యలు తీసుకుని, పలువురిని అదుపులోకి తీసుకుని స్వాధీనం చేసుకున్న లోహపు ముక్కలను సీజ్ చేశారు.
ఈ తవ్వకాలను ఎవరు, ఎలా ప్లాన్ చేశారు? అనుమతి లేకుండా తవ్వకాలు ఎలా జరిగాయి? అనే కోణాల్లో దర్యాప్తు సాగుతోంది. పంచాయతీ సమితి సభ్యుడు రాంకిషోర్ మీనా ప్రకారం, ఇది నిజంగా పాతిపెట్టిన నిధేనా? లేక మరేదైనా కారణమా? అన్నది పూర్తిస్థాయిలో విచారిస్తున్నారు. ముందుజాగ్రత్త చర్యగా, గంగాళాన్ని జిల్లా ఖజానా కార్యాలయంలో భద్రపరిచారు. లోహం స్వచ్ఛత, వయసు, చారిత్రక విలువను నిర్ధారించేందుకు Archaeological Survey of India కి కూడా సమాచారం అందించారు.
నిధులపై చట్టం ఏమంటోంది?
భారతదేశంలో భూగర్భంలో దొరికే క్లెయిమ్ చేయని నిధులపై కఠిన చట్టాలు ఉన్నాయి. ఇండియన్ ట్రెజర్ ట్రోవ్ చట్టం ప్రకారం, రూ.10 కంటే ఎక్కువ విలువైన వస్తువు భూమిలో పాతిపెట్టబడి దొరికితే అది “నిధి”గా పరిగణిస్తారు. అలాంటి నిధి లభించిన వెంటనే జిల్లా కలెక్టర్కు తెలియజేయాలి. ఆ తర్వాత ప్రభుత్వ ఖజానాలో జమ చేసి, నిజమైన హక్కుదారుల కోసం పబ్లిక్ నోటిఫికేషన్ జారీ చేస్తారు. చట్టబద్ధమైన యజమాని లభించకపోతే, అది ప్రభుత్వ ఆస్తిగా ప్రకటిస్తారు. నిధిని దాచడం లేదా దొంగిలించడం నేరం.
ప్రస్తుతం సిద్రా గ్రామ పరిసరాల్లో ఈ ఘటనపై చర్చ జోరుగా సాగుతోంది. మరిన్ని అక్రమ తవ్వకాలు జరగకుండా పోలీసులు గస్తీ పెంచారు. ఈ ప్రాంతంలో ఇలాంటి గంగాళాలు ఇంకేమైనా ఉన్నాయా? అన్న దానిపై అధికారులు మరింత పరిశీలన చేపట్టారు. ఒక సాధారణ తవ్వకం, ఒక్కసారిగా రాష్ట్రవ్యాప్తంగా చర్చనీయాంశంగా మారింది.
ఇవీ చదవండి: Malavika Mohanan : మాళవిక మోహనన్.. రాజా సాబ్ ఈవెంట్ పిక్స్ వైరల్..
Ajay Ghosh : ఆ హీరో నిజంగా గొప్పవాడు… అంత పెద్దవాడైనా చాలా ఒదిగి ఉంటాడు: అజయ్ ఘోష్ వ్యాఖ్యలు వైరల్